Kasumigaura Marathon 今年已是第24界. FM 有18000人, 10MILES 5000人, 5km 2000人, 輪椅賽15人, 至於盲人則冇限 (因佢係國際盲人marathon). 網上報名係先到先得. 我哋成group 人都係由station 在日本的師兄代為報名, 全部ok (但師兄話, 這個賽事都幾popular, 所以好快就滿). 報名費唔貴, FM 5000yen, 10MILES 4500yen, 5KM 3500yen.
佢哋嘅website 都幾informative ~ 如你懂日文的話. 尤其可以在youtube 看到成條route + elevation chart…讓你好好準備.
因師兄有日本住址, 所以選手包就直接寄到佢屋企. 內裡有份大會news, 號碼牌 同寄存行李的tag同膠袋一個. 我哋仲大鄉李問佢: 冇t-shirt 嘅? 原來t-shirt 同紀念品, 係要你跑完才會有的.
我地由新宿去土浦, 要先坐山手線去上野, 再轉車入土浦, 成程起碼要1.5-2小時. 雖然10miles 開始時間為9:20am (所有賽事, 都只得一個時段 ~輪椅賽 9:50am, FM 10am, 5K 10:30am). 但為了好好休息, 我哋19號就入土浦瞓.
我哋在香港嘗試book hotel, 但都book 唔到, 問親都話full. 後來拜託了一位日本朋友book, 就book 到, 地點非常好, 就在土浦站隔離, 距離起跑點都只係10mins walk. 7000yen 一間房(可兩個人住, 但我哋豪啲, 一人一間), 仲包早餐. (後來才知道, local 地方啲人真係唔多識英文, 溝通上已有問題. 而book 房, 真係靠個信字, 不用deposit 的, 到時show up 才比錢. 因佢哋試過好多外國人book 咗又no show, 所以為免麻煩, 唔接外國客. 反正國內人都已逼爆hotel))
19號到入去已差不多9pm…真係凍到我打冷震….氣溫最多得5度. 心諗, 大鑊la….我最怕凍 (跑緊唔怕凍, 但驚在起跑點等嗰時會凍死). hotel 好貼心, 每人都派我們一包溫泉粉, 浸個bath; 再送一包好relaxing 的膏藥, 等你雙腿relax 吓, 所以晚上睡得好好.
終於到20號, 我起身第一件事係冲出hotel, 感受吓啲溫度…都幾凍, 得6度, 陰天, 但好在冇落雨. 早餐都幾好….有大量 “炭水化合物”比各人 “補身”…….可惜我意外地 “牙骨移位” (我久時久就會發生, 要等幾天待佢自然復位才可恢復咀嚼功能), “妹” 咗半天才食到一片方包. 加上向來血糖都好飄忽, 其實真係有啲驚自己衰收尾.
8am出發到會場, 唔識路都冇問題, 因沿途都好多人, 你跟住人龍去就啱架la. 入到球場, 發覺好多人在扎營 ~ 有私人休息室….旁邊亦有好多locker, 如你唔想寄存行李都得.
好在天公造美….造完warm up 拉筋, 終於可以脫掉羽絨去寄存. 去埋toilet 就上線 (嗰時已9am). 會場冇乜英文指示, 好在都識小小日文, 所以問人起點响邊, 跟住就行過去.
起點反而就會按你號碼牌分區, 順序出發. 雖然人山人海, 但大家都好守秩序, 絕無碰撞, 亦不會見到有人 “盡量偷位” 逼入前排….亦沒有喪自拍的情景. 大家都係略略跟朋友影一兩張, 就收埋電話. 好在我都係 ~ 因我太想攞張cert, 所以決定源途唔影相. (賽事中的相, 係靠別的隊友提供)
一聲令下, 賽事在歡呼中開始….我同隊友說聲good luck, 就各自跑. 雖然賽道不算闊, 但各人都在跑, 很禮讓, pacing亦造得好平均和諧, 所以, 你唔會覺得有人 “塞住晒”. 你亦不會見到人在你前面轉來轉去, 死衝死逼, 係都要爬你頭, 但爬完又冇氣, 忽然停在你面前 (在香港, 我見得多) ….反正去到中段, 甚至上斜位, 你自然會揾到一條 “快線”比你爬頭. 我都係趁嗰時爭回點時間.
開始的地方在市中心…有不少上斜位, 但之前特別加操過上斜練習, 所以不難應付. 沿路, 我終於知道, 為什麼大家對日本馬拉松的鍾愛 ~ 因為真的好感動! 就係市民的打氣, 令我笑住嚟跑, 冇乜食嘢都有energy !
l 很多媽媽帶住幾歲的小朋友, 給你打氣, 給你hi 5…..你會聽到小朋友真的好用心, 好用力的說 “ganbate!!!”
l 有些老人家, 行動不便, 都坐住輪椅在路旁給你打氣 ~ 天氣幾凍架…但公公婆婆都不介意坐在路中吃風
l 在3k 左右, 走走吓, 忽然看見好多跑手向住一座大厦揮手 ~ 一看, 原來係一家醫院, 好多護士扶住啲病人, 在窗口給我們揮手打氣
l 還有4k 左右, 有大型日本歌舞團表演助興, 10k 又有live band
l 到了5k 左右, 忽然聽見後面的跑手叫ganbate 同拍手, 原來輪椅賽的選手經過…我當然又叫埋一份!!!!
水站由5k 開始就有, 差不多2-3k 就會有另一個. 會有清水同運動飲品….但都係好有秩序, 你不用逼埋去的…..有一點我很欣賞 ~ 雖然都有好多人, 飲兩啖就掉隻杯在路邊….但亦有很多人, 先會在路邊倒走飲唔晒嘅水, 再將杯帶到垃圾箱前才掉…..有些, 甚至揸住個杯, 跑足1k, 見到有垃圾袋的工作人員才掉.
10k 後的水站, 有糖, 香蕉同冇渣紅豆湯造補給. 反正我有power gel, 所以冇食la….只係誤以為紅豆沙係水, 飲咗幾啖.
其實全程我見唔到人變步兵…..只係10k 後, 開始見到有人抽筋, 要自己拉 (但好奇怪, 全程見唔到有救傷站, 定係佢哋嘅水站, 都有人識得急救呢?), 跟住gut 吓gut 吓咁行. 就算跑得慢, 大家都堅持跑的. 我的pacing 大概6″3x, 剛好就係中游份子.
大概跑了9k, 就會離開市區, 轉入郊區. 景色很美, 兩邊都是田野, 跟手就入了樹林. 出了樹林就見到海邊….各跑手都好自律, 因賽道不算闊, 所以沒有人在影相自拍 (其實日本跑手們很少會跑跑吓影相); 只是到了14k, 賽道又平又闊時, 才見到少量人影相….但都係好快手, 影一張就pit.
我雖然冇乜食早餐, 條命靠包power gel 頂住, 但去到11k, 見到已比預期快, 同仲有好多貨…嘗試加速…點知跑咗冇500m, 就橫膈膜痛, 所以就慢番 (這個位好邪, 原來我的高手師姐, 都係在那裡開始橫膈膜痛). 好在跑多1k 又冇事了. 其實去到臨尾 2k, 都有思想掙扎好唔好再加速, 試多次 ~ 因 “感覺上”, 仲有大把貨….但諗諗吓, 都係安全第一…..反正cert 應該攞得到, 無謂衰收尾….因始終冇乜食過嘢, 好驚血糖忽然drop 跟手就會暈. 原本以為最搏都只可以1小時55分完成, 結果原來可以”好舒服”地1小時47分跑完.
跑完, 就係攞禮物時間….首先會有STAFF 同你攞走號碼布上的晶片, 再去攞T-SHIRT…..那裡分咗SS-XL 的COUNTER…你想要乜SIZE, 就行過去攞…之後仲有水, 香蕉, 麫同COUPONS. 最興奮係張CERT 係即場印比你.
會場一帶, 有food fair 同不同運動牌子的賣物會, 但我哋幾個趕住出市區shopping, 所以跑完回hotel 冲個身就pit. 但有隊友去咗….話acsis 好抵
以下是跑全馬師兄提供的相片, 補給站的食物看來很充足
後話
我亦明白為何日本人馬拉松的完成率咁高……因大家真的平時有跑開….不會冇乜練過就上場 ~ 點解我知? 就係睇佢哋對鞋……….日本人的跑步gears 好靚, 我見到好多人都會著上當季的新衫….但鞋…你看得出是有 “歷練”的.
在香港….好多時, 到了3k, 你就會看到人開始要行. 但日本, 我去到14k左右, 會有個turn around point……可以看到慢我1-2k 的人…..但冇人行ing…都係跑ing
香港, 起跑時, 好多人都係威係勢, 冲得好快, 但3k 內見頂, 就行…..有啲, 就係行幾步, 又跑幾步. 但日本人, 佢哋嘅跑速造得好平均, 不會忽快忽慢……但點都堅持 “跑ing”……除非抽筋局住行.
試過今次日本的馬拉松, 的確好好玩, 好吸引, 已即時同隊友研究未來有冇半馬以內的賽事可以再去. 好可惜, 大賽都係全馬的多……..我暫時冇資格去 ~ 除非有天, 我練到42k可以全程跑不用行la.
