Tag Archives: 2017 德島馬拉松

我的初馬 ~ 2017 德島馬拉松

向來有造運動, 但唔跑步的我, 經我最尊敬的私人教練KITTY 一句: 你試吓跑10K la ~ 就係咁2011, 第一次參加渣打10k. 雖然搏了老命train 了半年, 亦搏了老命跑, 但都要1.5小時先完成, 但跑完真係好開心…因終於完了我中學時, cross country (得嗰2-3k) 必跑唔到的遺憾.

 

但後來, 發覺越跑越慢, 對腳又越來越痛 ~ 不過又可以食好多嘢都唔增磅 (這是我跑步的最大動力)….所以經朋友介紹, 就入了跑會, 開始正式學習跑步.

 

在跑會, 識到一班好好玩的同學仔 (連老公都揾到埋! 嗰吓amazing), 又有個好好嘅馬高sir….然而, 對潺底嘅我嚟講, 訓練超辛苦…..所以當年, 我出名: 太熱, 太凍, 太大風, 落雨 ~ 都唔會去上堂. 但慢慢, 經同學感染, 開始參加不同賽事, 週末又一齊去跑吓, 行吓山….體能就開始好dd, 出席率亦有所改善.

成班同學連同阿sir一齊去春川跑步, 真係好開心!!!

 

之後, 第一次去日本土蒲跑10miles (大概16k), 係我人生中, 最認真投入訓練的日子…..亦係病得最甘的日子….幾本上, 連續3個月, 不停病, 隔個星期要睇一次醫生…..KITTY 告訴我, 這叫over training ~ 身體已透支了. 不過, 土蒲一役, 我的10k 時間, 就由1.5小時, 進升到1小時05分 (自此都係咁了)

 

去到跑半馬, 都係朋友話好玩, 叫試吓….第一次跑完, 我只可以講, 對腳不是我的…破住行咗幾日. 不過, 再跑多3幾個半馬, 對腳就冇乜事了 (不過, train 嗰時, 都係會時時病). 但去金門嗰次, 為咗造2.5小時 (陰公, 對好多人嚟講, 這是慢到不得了的時間, 但已係我的目標)…..係…..我好認真咁去跑, 真係得咗………不過一跑完, 即抽筋….跟住開始連環嘔咗n 次, 又發燒…..後來睇醫生, 先知這也是透支同電解質唔夠.

(未跑前, 係威係勢; 跑完病到死狗咁)

        

因金門嗰次嘅教訓太慘烈….所以我話過唔可以再犯….亦知自己潺底…別人叫 “輕量”的操練, 對我來說, 已係攞命……咁跑步求開心同健康, 唔駛吓吓練到病跟住跑到嘔啩 !

 

而全馬, 向來不是在我的to do list 內…..一來, 肯定辛苦, training 一定要夠…唔係行都行唔到. 另外, 就係gym 有位體能勁我1000條街的教練, 她跑了未夠30k, 就要被掃走搭巴士….我何得何能.

 

但忽然有跑友話德島馬拉松幾啱初馬: 路平, 有7小時……..同埋有跑友BEAR 氏伉儷一齊去…..咁我就當去旅行, 玩吓…..中途唔得咪CALL 的士走人, 所以冇負擔.

 

不過….我都有開始準備的. 就係JOIN 多個跑會, 真係堅練耐力 . 就係咁, 我主要係每星期去操山練體能, kitty 教練就助我練肌力同拉根, 王教練每次跑, 起碼13k 以上, 練耐力. 馬高sir 就練到我心肺功能………我有努力架, 有小心咗保養, 係病少咗…但始終疲勞, 腳痛就無可避免 (好在唔係根膜炎)

 

亦因為肌肉疲勞, 渣馬前1星期, 拉傷了髖關節….好在一輪針灸推拿後, 我跑到….落場嗰日, 我都唔敢開快….只係按住感覺跑……..唔太辛苦…因絕不可以再傷, 否則就會延誤全馬的訓練………但想不到, 2017渣半馬, 係我最舒服的半馬, 但又造到PB…….咁我心諗….我的TRAINING 應該找對了方向.

 

王教練比咗幾個TIPS 我…要完賽, 一定要造到足

  • 每5K, 就行3分鐘. 有力都要行, 不要KEEP住跑
  • 而每次行的時候, 不要拖腳…要急行
  • 唔可以開得快
  • 就算之後抽筋, 都要keep 住行.

 

雖然已好小心保養, 但去德島前, 又病…..今次係傷風菌入腸 ~ 腸胃炎….大佬, 連嘢都食唔到, 又發冷, 又肚痛又作嘔….點跑. 又係中西醫一齊睇……好在去到德島時總算頂得住 (西醫覺得我精神緊張, 才會跑親都病……我都有反醒….但明明這次我冇壓力喎……不過, 後來, 我好sure, 這不是壓力造成………因跑完回港…我依然腸胃炎…屙到暈….hahahaha)

 

講吓德島….真係好amazing…..冇乜人架….去到運動場攞選手包 (我知, 日本人會寄去屋企不用去攞)..成個場館, 就得我哋4件去攞嘢….之後有零星的香港.中國.台灣人去攞….冇expo….連記念t-shirt 都冇得買 (有懂英語和國語的義工派選手包). (不過, 所有hotels 已滿…我哋4個, 連同另外4位都係香港人, 住民宿. 雖然, 8人得1廁所….大家又好合作, 運作順利). 之後, 我哋就行咗20min 去起跑點……..嗰時已係4-5點….乜都冇…得幾排流動廁所而已.

 

而我們都對自己的bib 非常滿意: 分別係 46 (死佬), 47 (死x), 48 (死x婆)同49 (死狗)….各有特色咁la!

 

早上9am 起跑, 我哋B 區. 我們差不多8:15am 才到….去到見到好多人, 但秩序好, 放行李不用排, 廁所就只係等15-20min…..好ok. 上線位又好近廁所位. 不過…..我們到嗰時, 啲工作人完先開始搭個主禮台…..有效率地, 在鳴槍前完成.

RE Camera

這位million 跑得超快….bear 生話佢sub4都有可能….著住咁大件嘢都咁快!!!

RE Camera

一開跑, 係跑過一個商業區, 就上橋過對面岸…..心諗, 只要過足7條橋, 就到折反點 = 跑咗一半…..開頭, 都幾happy….跑得慢, 又可以行…又有時間食吓市民啲補給….同埋大把人係我嘅pace…冇壓力. 啲市民又一家大細, 連埋隻毛孩都帶出嚟打氣….好順利在自己target time 內就完成10k.

 

跟住都係同一個景 (右面河, 左面田)…..好在, 可以望住啲橋造REFERENCE…跑到第6條橋, 開始知中伏了…因跑極, 又唔見第7條橋……而啲景係一樣的….感覺就如在跑步機上跑咁……

 

大概18-19K, 陪跑熊貓已話頂唔住, 腳痛 (因佢要用我嘅pace = 太慢, 令佢傷患位開始痛), 咁我咪叫佢跑快啲…最多去到前面水站等吓我. 就係咁…開始一個人跑…冇人同我傾計, 啲景又冇變….好似跑極都在原地. 不過….終於都在target time 完成半馬, 又下一城.

 

過了半馬…. 熊貓表示佢好痛, 叫我自己往前跑住先….咁我只有自己去 (跟住就同佢失散了)……失散先知pk了…因啲錢係佢袋….我冇錢搭的士了………

 

而過了折返點, 即又去返對岸, 景色更令人 “讚嘆” ….在低處跑, 望唔到橋…係左邊斜坡, 右邊田…..真係唔知自己去到邊…..心情開始低落…好在條氣冇事, 仲有力…係隻腳開始有啲攰….感覺還不太差, 只係時間好難過! 不過, 都在4小時內造到30k 的終極target. 造到終極target = 就算我齌行, 都可以回到終點.

RE Camera

當場, 心情又大好…並開始放慢腳步 (其實都有啲攰架la) ~ 為咗令時間易過, 係補給都走去8 吓, 啱口味的又食吓 (王教練叫我, 前30k, 都咪飲太多水, 食太多嘢….所以我自把自為, 過了30k, 自動放生). 有啲市民造的補給好有heart ~ 如有位太太造了蘑菇打碎, 再放入溫暖的miso soup….真係好感動…直情要停下來, 飲完, 再多謝了佢幾次先再起步. 有啲小朋友又打氣得好落力, 我又走去同佢哋玩吓….見到有得噴舒緩肌肉噴霧的地方, 又去爽吓, 有sunblock 補又去補吓……..所以…成程, 我應該可以回本 (仲食咗無限的水果, 飯糰, 汽水, 糖, 糯米酒同各式運動飲品).

 

去到大概38k, 見到bear 太, 開心到爆…終於有人陪….所以同佢行500 跑500….輕輕鬆鬆回到終點. 以5小時52分完賽.

 

完賽後感覺極之良好, 除咗腳攰, 又冇乜嘢喎…都可以行樓梯, 同有胃口去食麫. 之後, 行咗成大半個鐘回民宿又ok喎 (梗係再跑唔郁….但行就冇問題)…….所以仲大大聲同熊貓講….完來跑全馬冇想像中辛苦….跑10k 仲慘.

 

之後, 我們就離開德島, 坐了大概2小時車去香川縣浸溫泉………嗰吓就死火了….因坐坐吓車, 可能隻腳屈住, 開始覺得痹…..落車時, 就成個阿婆咁, 要慢慢嚟……..過馬路時, 見有車迎面駛過嚟, 都跑唔郁….都係以龜速地行.

 

好在, 浸完溫泉瞓一晚, 第2朝就復活. 雖然, 都係跑唔郁 (發覺腳上啲勞損位有啲痛)…但普通行同上落樓梯都冇嘢.

 

賽後總結

  • 行山當操長課 (每次4-5小時), 對我來說很受用. 基本上, 去跑全馬前, 我只係跑過一次32k, 睇吓感覺如何.
  • 之前喪練步頻亦很有幫助 ~ 因可以跑得耐, 但相對唔太攰. 記得過咗30k, 腳開始攰, 如步距大小小, 腳會痛…反而用婆仔步, 密密腳咁去, 就冇事.
  • 跑5k, 行300m 都有用….開始時, 真係比無數人過頭…..但過咗15k 左右…已開始追得番好多人….亦因為有這策略…我先可以造到4小時完成30k 的終極目標
  • 今次, 算係病得少….只病了1次….但病到賽後一個月先斷到尾. 但腳痛, 髖痛, 蘿友又痛……好多痛….這有待改善

 

始終, 全馬不是我這等弱雞玩的….試過就算…因當中真的要花很多時間去練和賠上健康 (這我真係覺得冇乜謂). 但跑過全馬, 就令我更加清悉地知自己嘅能力同未來嘅方向 ~ 就係一定要改好個跑姿…….之後, 再從新出發.