幾年前都去過韓國兩次, 但之後, 就一直冇話好有興趣再去. 到近年, 韓風又轉得很強勁, 所以就決定去吓, update 吓, 體驗吓.

我最愛試skincare 同makeup products, 其實對我來說, 韓國的出品, 真係大件夾抵食, 以這價位又有如此的水準, 真係好不得了. 所以我近年都瘋狂地愛上.

記得我講過, 價錢vs 品質的理論嗎 ~ 即 $10 買到80分的東西, or 你比$100 去買到90 分的東西…..只係攞最後嗰10分, 但你要比多10倍錢…肯唔肯, or 值唔值, 就係你自己的決定.

對我來說, korean makeup products or skincare, 如只論質量撇開價錢, 絕對不是我用過最頂級的東西….但一加埋價錢入去考慮..佢就即時間飈升到極高的位置. 我絕對冇雄厚的財力去support 吓吓用貴嘢…所以, 平的貴的都用.

對, 韓國都有頂級嘢, 最大路莫過於雪花秀同后. 我只可以講, 佢哋好好 (因我見證過好多朋友用咗, 皮膚的確變得好好)…只係我同佢哋唔多夾 ~ 用在我身, 效果並不明顯 ~ 同平佢哋一節的韓國brand 差唔多 ~ 那, 我梗係用平brand la. 對我嚟講, 最喜歡的skincare是missha, tony moly 的出品, 化妝品就係 espoir + clio 的眼線筆

本來, 去韓國, 另一個目標, 就係買衫買鞋….當然, 我唔係嗰啲好識得捐窿捐拏的精明人…我都係去旅遊書 或朋友推介的地方去看看 (我去之前, 太忙, 乜都冇plan, 都係靠熱心的朋友比料我, 去到當地, 再按該日的心情, 想去邊就去邊)….好可惜…睇得啱嘅, 就貴到飛起 ~ 如要hkd3xxx 一件的外套, 香港大把choice, 我駛乜老遠托回來. 再唔係, 啲款, 根本唔啱我這巨人著. 去到後段, 終於在弘大買到一件價啱樣啱的西裝摟 ~ 同埋我喜歡睇手作仔 , 所以弘大的weekend market 啱我

至於食 ~ OK LA….始終口味問題….冇話一家特別回味, 除咗 Osulloc 的綠茶蛋糕 (明洞大街)…這是我唯一想encore 的 ~ 佢哋包green tea latte 好好味…去到m-mart  (韓國超市)仲有特價

去的時候, 天氣很好, 不算太凍, 楓樹只係開始轉色…朋友們遲我1星期出發, 就可以見到很美的紅葉. 咁我都覺得南山同梨大的校園幾靚架.

南山:

梨大:

overall, 我這漢奸prefer 去日本多啲…無論食, 買, 交通, 風景區我都覺得好啲. 韓國最吸引我的, 只係佢哋嘅skincare….但現在, 香港好多水貨舖啲價都好經濟, 不用一定要自己去當地入貨la…為番起, 機票hotel 都係cost, 你慳唔得幾多.

我絕不是精明的人, 以下係我懵剩剩的 “心得” (可能係老點架, 你哋自己scan 吓):

1. 我去買skincare 時, 都係比credit card ~ 發覺滙率比pay cash 差 (但去日本 or 台灣, 好多時, credit card 的rate 會好啲). 但用credit card 又有海外bonus 比番你…咁維番埋條數, 都ok la.
2. 退稅公司大至有3檔….我只識分顏色 ~ 有橙, 藍同白. 我最多係橙色. 偶爾發現, 原來只要係橙色, 就算唔同地方買 (因有些地方不會即時退番錢比你, 但有些地方會)….只要你去大公司如樂天, 而佢哋的退稅counter 又係橙色…佢哋會一次過, 先退晒cash 比你. 那你去到機場, 就只用到海關dum 個印, 交番啲單比佢哋就得 ~ 不用再排多次隊去攞cash.
3. 每家退稅公司都會食你價, 有時要買夠3萬won 甚至5萬won 先有得退…所以, 我覺得after immigration 的duty free 買嘢最抵…同埋已入閘, 你買乜都好, 都唔會計入你luggage. 只係duty free 的貨當然唔及出面多, 但大路產品, 就多數有. 入面的duty free 亦不似外面的shop 會比samples 你…但算la…嗰道值得幾多.
4. 因又要搞退稅, 又要check in, 還WIFI,  check in 後仲要shop 多轉…我哋預早咗5小時去機場: 車程 1.5小時 (我哋係SUNDAY AFTERNOON走, 冇塞車都要咁耐), check in 好好彩, 嗰時冇人, 30分鐘搞掂. 退稅嗰時, 又係好好彩, 冇乜人, 排咗30分鐘…但後來有團到, 睇怕要排1小時…但你唔排唔得…因那些你已攞咗cash 的單, 如冇比番海關, 會罰款架 ~ 直接charge 番你credit card; 過immigration 又要30-40min. 入到去, 仲要分番3檔去攞cash, 都係時間. 其實預5小時就啱啱好…可以之後有足夠時再SHOP , 用埋啲WON + 嘆埋個TEA 先上飛機
5. 如你預咗SHOPPING, 又如果係飛國泰的話, SUGGEST 你哋飛之前, 在香港機場 ASIA MILES 的COUNTER , 用9000 分換多10KG (因離開咗香港, 就冇得換). 所以我哋今次CHECK IN 得很順利 (見到有幾個女仔爆咗磅, 好徬徨, 問我點解我咁多嘢都過到…..但佢哋就大鑊….愛莫能助了). 當然, 我亦有朋友試過, over 咗好多, 都照比佢哋過….那, 你搏吓同你check in 那位地勤仁唔仁慈la.
6. 仲有, auntie 我年紀大….我來回機場, 都堅持要坐巴士, 揀的hotel 亦要門口有巴士站 (雖然坐地鐵會平啲)…因我頂唔緊要攞住啲行李行來行去, 仲要行上行落.